Kerberede
Was iss, was soll, was kann die Kerbered Ihr Leit?
Iss se Geschwafel, Gebabbel, dumm Geschwätz?
Gelaber, uuffgeschriebene Gedankekrez?
Ihr habt Dorscht, unn kennt net warte?
Ihr habt Hunger, uff Worscht unn Brate?
Des versteh ich ganz und gar,
wie also war des letzschte Kerbejahr?
Beim Adventsmarkt, do war es nass unn dunkel
Unn viel wärmer als kalt –
war es aach net.
De Glühwein unn de Amaretto hunn geschmeckt
Die Kinner sinn beim Nikolaus nit angeeckt
Unn doch, als am End
Die Kasse wurd gemacht
Do hott de Worschtstand so manche Helfer
Ganz unn gar dorchennaner gebracht
Unnerm Strich warn Miese in der Kasse drin,
Nix unn noch weniger verdient
Die Lösung: Do hott sich wohl so en dolle Kopp bedient?
Vielleicht geschieht ja im Dezember 2009 gar noch ein Wunder
Unn der Dolle legt des Geld zurück
Das wäre dann – ein wahres Weihnachtsglück
De nächste Dunnerschlag, des war Silveschter
Die Luft war kalt, der Regen fiel,
die Gasse wurden glatt unn glätter
unn die Gäscht vom Silvesterfescht
sinn froh, unn mit heile Knoche
in die Gemaandehall gekroche
Dort warn Bayerische Bube am Stimmung mache
E warm Büffet unn annern gute Sache
Die Stimmung außer Rand und Band
Und mancher erst sehr, sehr früh
den Heimweg fand ...
Des war der Auftakt zum Jubiläumsjahr
Mit viele Sitzunge und noch mehr Protokolle
E paar Unentwegte, Angaschierte, habbe mit Laptop
unn mit Notebook alles uffgeschribbe
Awer, wie im richtige unn echte Leebe
Wusst am End kaaner mer, was wer,
zu welcher Sach gesagt oder geschribbe –
So iss es halt bei der Erinnerung geblibbe...
Apropos Erinnerung: Do war doch mol e schlau Schdudierde
aus Meenz bei uns im Ort.
Sie wollt uns zukunftsfähig mache
unn lauter Visionen in uns wecke
Dorfmoderation nennt mer die Methode,
was gar net schlecht iss,
unn außerdem in Mode
Bei uns do hot die Fraa die Zähn sich awwer auusgebisse
Weil mir schon immer besser wisse
Was für uns gut odder aach schlecht
Am End do hott die Franzen de Mut zum Ännern ganz verlore
Unn unser Zukunft, die wurd halt nit gebore
De Gemaanderat hott den Zug im Rathausbett verschloofe
Viel war von dene Oberschlaue net zu hörn
Außer laut Geschnarche
– Des Rathaus iss halt eine wunderbare Arche
Zurück zum Januar 2009:
Des war ein eisigkalter Frostbeitel
17 Dag lang wars weit, weit unner Null
unn de Benda mit seiner oberschlaue Solaranlaag
hott ogefange laut zu schenne
so mancher hott geheert, wie er im Heizungsraum tut flenne
Obwohl die Sunn so schön geschiene
Musst er heize wie en Doller
Denn sei Solarolag lag still unn stumm
Weil eingefroren, auf dem Dach herum
Zu wenig Glykol im Kreislauf
– Proscht, Ihr Leit!
Wie hott im Februar der Benda sich gefreut,
dass nix kaputt, geplatzt, gebroche war –
Es war wahrhaftich en eiskalte Start ins neue Jahr
Am erschte Mai, die Sunn hott wunderschön gescheint
Do warn mir Bockenummer all vereint
Als fröhlich bunte Wandrerschar
Dem Walderlebnis hingegeben
So viel Leit hott unser Wald schon lang nicht mehr gesehen
– Die Wildschweinrotten sah man in die
dunkelsten der dunklen Ecken trotten –
Ein Lob, und noch eins oben drauf
Haben die Landfrauen sich verdient
Mit tollen Stationen und bester Bewirtung
Haben Sie diesen Tag
Zum Walderlebnistag gemacht
Danke, danke; drei Mal hoch!
Bleibt uns erhalten,
wir brauchen Euch noch!
Aach an Pfingschte habbe mir richtich gut gefeiert
E Superjubiläum anngeleiert
Die Kerch war voll, unn beide Pfarrer froh
Nur de katholisch Todisco wars es net ganz so
Soi Obrigkeit in Meenz hott ihm en beese Brief geschribbe
Warum er an dem Sunntag net in Fürfeld iss geblibbe
Sich widersetzt hott dem theologischen Dekret,
an Pfingschte mer net ökumenisch feiern tät
De Todisco iss en unerschrocke gute Parrer
Er hott den Brief aus Meenz gonz weit weg weggelegt
Unn sich dann ohne Angst nach Bockenum bewegt
Mit seinem großen Herrn war er im Reinen,
nicht so mit den Herren in Mainz, den kleinen...
De Karl-Heinz übrigenswelcher, dess iss grad egal
– war am Brunnefescht in bester Feierlaune
Es war ein wunderschöner Tag
Die Sunn hott mit de Feschtgäscht
Um die Wett gestrahlt
Super Musik, bestes Essen, bestes Trinken
Unn de Karl-Heinz hatt en große Dorscht
Die letschde Absacker warn im Glas
Do hott der Karl-Heinz sein Höllenquart bestiege
Weil er wollt net noch en dollere Kopp an dem Daach kriege
En Blitzstart hott er hingelegt,
dass die Reife die Gass gefegt
Unn er war so schnell unnerwegs,
dass die Lisbeth und ihr Mann
voll erschrocke lauthals krischen
unn in Panik ihm sind ausgewichen
weil des eigne Leben zu retten
iss halt doch der größt Gewinn
danach, und nur danach stand ihr Sinn ...
Also, feiert jetz die Kerb, unn lasst die Audos,
Quarts unn sonschtige Vehikel aafach stehe.
Denn: Der Mensch hat zwei Beine – zum Gehe
Es lebe die Bockenummer Kerb!
| Kontakt | Impressum| Haftungsausschluss| Webdesign| |
|
© WEBDESIGN-GUNDAL 2010
